Xocalı rayonunda Azərbaycanın ərazi bütövlüyü
uğrunda döyüşlərdə şəhidlik zirvəsinə ucalan qəhrəman Vətən oğullarının
ailələri, eləcə də döyüşlər zamanı yaralanan qazilər daim diqqət və qayğı ilə
əhatə olunublar.

    Bu mənada Xocalı rayon İcra Hakimiyyətinin başçısı Şahmar Usubovun tapşırığına əsasən, iyul ayının 21-də Bakı şəhərində Xocalı rayon İcra Hakimiyyəti başçısının
müavini, İctimai-siyasi və humanitar məsələlər şöbəsinin müdiri Lamiyə
Qarayeva, Xocalı şəhər 2 nömrəli uşaq musiqi məktəbinin və Xocalı şəhər 2 saylı tam orta məktəbinin bir qrup pedaqoji kollektivi və şagirdləri, Vətən müharibəsi
şəhidlərinin ailə üzvləri ilə birlikdə şəhidlərimizin məzarlarını ziyarət ediblər.

       Vətən
müharibəsi şəhidləri - II Fəxri Xiyabanda dəfn edilmiş Azərbaycan Ordusunun
leytenantı Cavadov Namiq Rəhbər oğlunun, Binə Şəhidlər Xiyabanında dəfn olunmuş
Azərbaycanın Daxili İşlər Nazirliyinin Daxili Qoşunlarının baş çavuşu
Abdullayev Tural Şakir oğlunun, Nizami rayonu, Keşlə qəsəbəsində yerləşən Şəhidlər Xiyabanında dəfn edilmiş Azərbaycan Respublikası Silahlı Qüvvələrinin
hərbi qulluqçusu Əhmədov Nicat Həsən oğlunun məzarları tədbir iştirakçıları
tərəfindən ziyarət edilərək şəhidlərimizin məzarları önünə dərin ehtiram əlaməti olaraq gül
dəstələri düzülüb, ruhlarına fatihə oxunub.

      Daha
sonra tədbir iştirakçıları Vətən müharibəsinin qaziləri - Müzəffərli Həsən Ələddin oğlu, Nəcəfov
Elvin Sahib oğlu, Süleymanov Hikmət Rafiq oğlu ilə evlərində görüş keçirərək onlara mənəvi dəstək göstərib, müalicələri ilə maraqlanıblar.

     
Görüşlərdə çıxış edən Lamiyə Qarayeva və digər natiqlər qəhrəman Vətən
oğullarının şərəfli döyüş yolundan söz açıblar. Bildirilib ki, Vətən
müharibəsinin qazalınan Şanlı qələbədən sonra xalqımızın başı ucadır. İndi
qalib xalq kimi qürurla yaşayırıq. Öz canlarını, torpaqlarımızın bütövlüyü
uğrunda fəda edən Vətən oğullarını xalqımızın daim yaddaşındadır. Onların ailə
üzvləri diqqət və qayğı ilə yanaşmaq hər birimizin borcudur. Xocalı rayonunda
şəhid ailələri, qazilər, veteran döyüşçülər hər zaman diqqətdədir, onların
qarşılaşdıqları problemlərin həlli istiqamətində bütün köməkliklər edilir.

      Şəhid
ailələri və qazilər göstərilən diqqət və qayğıya görə ölkə başçısı İlham
Əliyevə və Birinci vitse–prezident Mehriban Əliyevaya təşəkkürlərini
bildiriblər.